
დაბალი დოზის ნალტრექსონი
დასახელება და შემადგენლობა
შემადგენლობა: აქტიური ნივთიერება: ნალტრექსონის ჰიდროქლორიდი - 1.5 მგ თითოეულ ტაბლეტში. ფარმაცევტული ფორმა: ტაბლეტები. შეფუთვა: #30 ტაბლეტი.
გამოყენების ჩვენებები
მედიკამენტი ინიშნება 18 წლის და უფროსი ასაკის მოზრდილ პაციენტებში შემდეგი მდგომარეობების კომპლექსური თერაპიის შემადგენლობაში: ქრონიკული ნეიროანთებითი და აუტოიმუნური დერმატოზები: ფსორიაზი, ატოპიური დერმატიტი, ბუდოვანი ალოპეცია, წითელი ბრტყელი ლიქენი, სკლეროდერმია; ქრონიკული, რეზისტენტული ქავილის სინდრომი: ატოპიური დერმატიტის, ეგზემისა და სისტემური დაავადებების დროს; ქრონიკული ტკივილისა და ანთებითი სინდრომები: ფიბრომიალგია, ქრონიკული დაღლილობის სინდრომი, კომპლექსური რეგიონული ტკივილის სინდრომი (CRPS); ნაწლავის ქრონიკული ანთებითი დაავადებები (IBD): კრონის დაავადება და არასპეციფიკური წყლულოვანი კოლიტი (მსუბუქი და საშუალო სიმძიმის).
ფარმაკოლოგიური თვისებები და მოქმედების მექანიზმი
ფარმაკოლოგიური თვისებები ფარმაკოდინამიკა ფარმაკოთერაპიული ჯგუფი: ნერვული სისტემა; საშუალებები, რომლებიც გამოიყენება დამოკიდებულების დარღვევებისას; ოპიოიდური რეცეპტორების ანტაგონისტები (ATC კოდი: N07BB04). მოქმედების მექანიზმი: დაბალდოზიანი ნალტრექსონი (LDN) წარმოადგენს ოპიოიდური - (მუ), - (დელტა) და ნაწილობრივ - (კაპა) რეცეპტორების კონკურენტულ ანტაგონისტს. სტანდარტული მაღალი დოზებისგან (50-100მგ) განსხვავებით, დაბალ დოზებში (1.5-4.5მგ) პრეპარატი იწვევს ოპიოიდური რეცეპტორების ხანმოკლე, დროებით ბლოკადას (დაახლოებით 4-6 საათის განმავლობაში). კლინიკური ეფექტურობა და უსაფრთხოება: ენდოგენური ოპიოიდების სტიმულაცია: რეცეპტორების დროებითი ბლოკადის საპასუხოდ, უკუკავშირის მექანიზმით, ორგანიზმი ზრდის ენდოგენური ენდორფინებისა და ენკეფალინების პროდუქციას, აგრეთვე ზრდის ოპიოიდური რეცეპტორების მგრძნობელობას. იმუნომოდულაციური და ანთების საწინააღმდეგო ეფექტი: LDN ბლოკავს ცენტრალურ ნერვულ სისტემასა და იმუნურ უჯრედებში (მიკროგლია, მაკროფაგები, ლიმფოციტები) არსებულ TLR4 რეცეპტორებს. ამის შედეგად ითრგუნება პროანთებითი ციტოკინების (TNF-, IL-6, IL-17, IL-1) და ნეიროტოქსიური ნივთიერებების გამოყოფა, მცირდება ქრონიკული სისტემური ანთება და ნეიროანთებითი პროცესები. ფარმაკოკინეტიკა აბსორბცია: პერორალური მიღებისას სწრაფად და თითქმის სრულად აბსორბირდება კუჭ-ნაწლავის ტრაქტიდან. მაქსიმალური კონცენტრაცია პლაზმაში (C) მიიღწევა 1 საათის განმავლობაში (T). განაწილება: პლაზმის ცილებს უკავშირდება სუსტად (დაახლოებით 21%). აღწევს ჰემატოენცეფალურ ბარიერში და ფართოდ განაწილდება ორგანიზმის ქსოვილებში. მეტაბოლიზმი: განიცდის პირველადი გავლის მეტაბოლიზმს ღვიძლში. ძირითადი აქტიური მეტაბოლიტია 6--ნალტრექსოლი (წარმოიქმნება დიჰიდროდიოლ დეჰიდროგენაზას ფერმენტით), რომელსაც ასევე გააჩნია ოპიოიდური ანტაგონისტური აქტივობა. ელიმინაცია: ნახევრადგამოყოფის პერიოდი (t1/2) ნალტრექსონისთვის შეადგენს დაახლოებით 4 საათს, ხოლო 6--ნალტრექსოლისთვის - 13 საათს. გამოიყოფა ძირითადად თირკმლებით მეტაბოლიტების სახით.
დოზირება და მიღების წესი
მიღების რეჟიმი: მიიღება პერორალურად, დღეში ერთხელ, უშუალოდ ძილის წინ (დაახლოებით 21:00 – 23:00 საათებში), რათა პრეპარატის მოქმედების პიკი დაემთხვას ენდოგენური ენდორფინების სინთეზის ფიზიოლოგიურ ღამის პიკს. სტანდარტული დოზირება და ტიტრაციის სქემა: საწყისი დოზა: 1.5 მგ დღეში ერთხელ, ძილის წინ, 1-2 კვირის განმავლობაში. დოზის ტიტრაცია: ტოლერანტობის მიხედვით, დოზა ეტაპობრივად იზრდება 3.0 მგ-მდე (2 ტაბლეტი 1.5 მგ), ხოლო შემდგომ ოპტიმალურ თერაპიულ დოზამდე - 4.5 მგ დღეში ერთხელ. სამიზნე შემანარჩუნებელი დოზა: 4.5 მგ დღეში ერთხელ. ხანდაზმული პაციენტები (65 წელი) და მგრძნობიარე პაციენტები: მკურნალობა იწყება 1.5 მგ დოზით, უფრო ნელი ტიტრაციის სქემით. პედიატრიული პოპულაცია (18 წლამდე ასაკი): LDN-ის უსაფრთხოება და ეფექტურობა 18 წლამდე ასაკის ბავშვებსა და მოზარდებში დადგენილი არ არის, რის გამოც პრეპარატის გამოყენება ამ ასაკობრივ ჯგუფში რეკომენდებული არ არის.
გვერდითი მოვლენები
გვერდითი რეაქციები, როგორც წესი, მსუბუქი ხასიათისაა და ვლინდება მკურნალობის საწყის ეტაპზე: ხშირი (1/100 - <1/10): ნერვული სისტემა: უძილობა, უჩვეულო სიზმრები, თავის ტკივილი, თავბრუსხვევა, შფოთვა. კუჭ-ნაწლავის ტრაქტი: გულისრევა, მუცლის ტკივილი, დიარეა ან ყაბზობა, პირის სიმშრალე. ნაკლებად ხშირი (1/1000 - <1/100): დაღლილობის შეგრძნება, დისფორფორტი, კუნთების ტკივილი (მიალგია), კანზე გამონაყარი.
უკუჩვენებები
ჰიპერმგრძნობელობა ნალტრექსონის ან პრეპარატის რომელიმე დამხმარე კომპონენტის მიმართ; ოპიოიდური ანალგეტიკების თანამედროვე ან სისტემატური მიღება (იწვევს მწვავე მოხსნის სინდრომს); ოპიოიდური დამოკიდებულება ან ოპიოიდების მოხსნის მწვავე სინდრომი; ღვიძლის მძიმე უკმარისობა ან მწვავე ჰეპატიტი; თირკმლის მძიმე უკმარისობა; ორსულობა და ლაქტაციის პერიოდი; 18 წლამდე ასაკი.
განსაკუთრებული მითითებები
განსაკუთრებული მითითებები და უსაფრთხოების ზომები ოპიოიდურ ანალგეტიკებთან შეუთავსებლობა: LDN ბლოკავს ოპიოიდურ რეცეპტორებს. პაციენტებში, რომლებიც საჭიროებენ გეგმურ ქირურგიულ ჩარევას ან ოპიოიდურ ანალგეზიას, LDN-ის მიღება უნდა შეწყდეს ჩარევამდე სულ მცირე 24-48 საათით ადრე. ძილის დარღვევები თერაპიის დასაწყისში: მკურნალობის პირველ კვირებში შესაძლოა გამოვლინდეს უძილობა ან უჩვეულოდ მკვეთრი, ინტენსიური სიზმრები. ეს სიმპტომები, როგორც წესი, გარდამავალია და დოზის შემცირებით ან დილის საათებში გადატანით კორეგირდება. ღვიძლის ფუნქციის მონიტორინგი: მიუხედავად იმისა, რომ LDN გამოიყენება დაბალ დოზებში (რაც გამორიცხავს ჰეპატოტოქსიურობის რისკს, რომელიც მაღალ დოზებს ახასიათებს), ღვიძლის ქრონიკული დაავადებების მქონე პაციენტებში რეკომენდებულია ღვიძლის ფერმენტების პერიოდული მონიტორინგი. ორსულობა და ლაქტაცია ორსულობა: ადეკვატური და კარგად კონტროლირებადი კლინიკური კვლევები ორსულ ქალებში ჩატარებული არ არის. ორსულობის პერიოდში პრეპარატის გამოყენება უკუნაჩვენებია. ლაქტაცია: ნალტრექსონი და მისი მეტაბოლიტები გადადის დედის რძეში. ლაქტაციის პერიოდში პრეპარატის დანიშვნის აუცილებლობისას ძუძუთი კვება უნდა შეწყდეს. ურთიერთქმედება სხვა სამკურნალო საშუალებებთან ოპიოიდური ანალგეტიკები (მაგ. მორფინი, ფენტანილი, ტრამადოლი, კოდეინი): LDN თრგუნავს მათ ანალგეზიურ ეფექტს. ოპიოიდების შემცველი ხველის საწინააღმდეგო და დიარეის საწინააღმდეგო პრეპარატები (მაგ. ლოპერამიდი): მცირდება მათი თერაპიული ეფექტურობა. იმუნოსუპრესანტები და გლუკოკორტიკოიდები: მაღალდოზიან სისტემურ სტეროიდებთან ერთად მიღებამ შესაძლოა შეამციროს LDN-ის იმუნომოდულაციური ეფექტურობა. ჭარბი დოზირება სიმპტომები: დაბალი დოზირების ფორმის გამო სერიოზული ტოქსიური ეფექტები ნაკლებად მოსალოდნელია. დოზის მნიშვნელოვნად გადაჭარბებისას შესაძლოა გამოვლინდეს გულისრევა, მუცლის ტკივილი, ცნს-ის აგზნება ან ძილიანობა, თავბრუსხვევა. მკურნალობა: ტარდება სიმპტომური და შემანარჩუნებელი თერაპია. სპეციფიკური ანტიდოტი არ არსებობს.
შენახვის პირობები
შეინახეთ ბავშვებისთვის მიუწვდომელ ადგილას. შეინახეთ არაუმეტეს +25°C ოთახის ტემპერატურაზე, მშრალ, პირდაპირი სინათლისგან დაცულ ადგილას.
მწარმოებელი
შპს „ფორტის ფარმაცეუტიკალსი“ Pharmaceutical Compounding მისამართი: საქართველო, თბილისი, გ. ჟვანიას ქ. No9 ტელ: 032 2053191 სამუშაო საათები - ყოველდღე 10:00-20:00
პრეპარატის შერჩევა, მიღების წესი, დამხმარე ნივთიერებები, გამოთავისუფლების მახასიათებლები და მომზადების შემდეგ გამოყენების საბოლოო ვადა უნდა დააზუსტოთ მკურნალ ექიმთან და გამცემ ფარმაცევტთან.
წყაროები და კონტექსტი.
წყაროები აღწერს მოქმედ ნივთიერებებს ან რეფერენსულ მედიკამენტებს და არ ნიშნავს ფორტისის მიერ მომზადებული პრეპარატების FDA-ს ან EMA-ს მიერ დამტკიცებას. საარქივო ინსტრუქციები შესაძლოა უახლეს ინფორმაციას არ ასახავდეს. ეს მიმოხილვა არ წარმოადგენს უსაფრთხოების სრულ სახელმძღვანელოს ან დანიშნულების რეკომენდაციას.
როგორ წარმოვადგენთ პროდუქტის ინფორმაციას